Турк даяар өргөн хэлмэгдүүлэлт эхэллээ

Нийтлэгдсэн огноо: 2016-07-20 08:56:00

Туркэд төрийн эргэлт хийх оролдлого гарсны дараа хууль сахиулах байгууллагын ажилтнуудаас эхэлсэн хэлмэгдүүлэлт одоо боловсролын байгуулллагын ажилтнуудыг хамрах болжээ. Туркийн Боловсролын яамнаас хувийн байгууллагад ажиллаж ирсэн 21 000 багшийн лицензийг хураан авсан байна.

"Эдгээр 21 000 багш, сурган хүмүүжүүлэгчид үндсэндээ террорист үйл ажиллагаатай холбоотой гэсэн мэдээлэл ирсэн учраас лицезийг нь хураан авсан” гэж Боловсролын яамны төлөөлөгч мэдэгдээд, тодорхой тайлбар өгөхөөс татгалзсан аж.

Тус яамнаас одоо боловсролын бүх байгууллагуудыг хамарсан өргөн хэмжээний шалгалт явуулж эхэлсэн бөгөөд Туркийн NTV телевизийн сувгаар мэдээлсэнээр, шалгалтын явцад 15 мянга 200 ажилтныг ажлаас нь чөлөөлөөд байгаа аж.

Anadolu агентлагаас мэдээлсэнээр, тус улсын Дээд боловсролын зөвлөлөөс төрийн их дээд сургуулиудын 1176, хувийн сургуулиудын 401 деканыг ажлаас нь халсан байна. Тэрчлэн ерөнхий сайдын тамгын газраас 257 ажилтан халагдсан бол Шашны удирдах газраас шашны номлогч, сүм хийдийн ажилтнууд хамрагдсан 492 хүн ажлаасаа чөлөөлөгджээ.

Турк даяар өрнөсөн их цэвэрлэгээний энэ ажиллагаа Дотоод явдлын яамны 8 777 ажилтныг ажлаас нь халснаар эхэлсэн бөгөөд ажлаасаа халагдсан тэдгээр бүх хүмүүсийг төрийн эргэлт зохион байгуулсан шашны алдартай номлогч Фетхуллах Гюлений үйл ажиллагаатай холбоотой гэж буруутгасан байна.

Сэтгүүлч Л.Отгонбат, www.ikhmongol.mn