Хятадууд Кубад тагнуулын бааз барихаар төлөвлөжээ 2023 / 06 / 09
Уолл Стрит Жорнал сонинд бичсэнээр Бээжин АНУ-ын Флорида мужийн эргээс 160 орчим км зайд Кубад тагнуулын бааз барих нууц гэрээ хийхээр Кубын талтай зөвшилцөлд хүрчээ.
Америкийн эрх баригчдын үзэж байгаагаар хятадууд Кубад тагнуулын баазаа байгуулснаар Америкийн цэргийн хэд хэдэн бааз байрлах баруун өмнөд эрэг орчмоос цахилгаан холбоо тэр дундаа цахим шуудан, утасны дуудлага, хиймэл дагуулын холбоо зэргийг тагнахаас гадна Америкийн байлдааны хөлөг онгоцнуудын хөдөлгөөнийг хянах боломжтой болох аж.
Эх сурвалжуудын мэдээлснээр Куба өөрийн нутаг дэвсгэртээ Хятадын тагнуулын бааз бариулсныхаа хариуд Бээжингээс олон тэрбум ам.долларын төлбөр авахаар зөвшилцсөн байна. Цагаан ордны Үндэсний Аюулгүй Байдлын зөвлөлийн төлөөлөгч Жон Кирби Уолл Стрит Жорнал сонинд бичигдсэн зүйлсийн зарим нэг баримт үнэнтэй нийцэхгүй гэдгийг онцолжээ. Тэрээр Вашингтон Хятад-Кубын харилцааг анхааралтай ажиглаж байгаа гэсэн бол Америкийн Батлан хамгаалах яамны төлөөлөгч, хурандаа Патрик Райдер Вашингтонд Хятад, Куб хоёр шинээр тагнуулын бааз байгуулах тухай мэдээлэл ирээгүй гэжээ.
Кубын Гадаад харилцааны орлогч сайд Карлос Фернандес де Коссио Уол Стрит Жорнал сонинд бичигдсэн зүйлс нь ямар ч үндэслэлгүй, худал хэмээн тодорхойлж, Вашингтоны Хаванагийн эсрэг тогтоосон эдийн засгийн хоригоо зөвтгөх гэсэн оролдлого хэмээн онцолжээ. Түүний хэлж байгаагаар Хавана Латин Америк болон Карибын арлуудад гадны ямар ч цэрэг байхыг үл зөвшөөрсөөр иржээ. Вашигтон дахь БНХАУ-ын элчин сайдын яамнаас энэ талаар юу ч мэдээгүй, ямар ч тайлбар өгөх боломжгүй гэжээ.
Өнгөрсөн 2-р сард Вашингтон АНУ-ын газар нутаг дээгүүр нисэж байсан Хятадын тагнуулын бөмбөлгийг унагасан хэмээн мэдээлж, уг явдалтай холбоотойгоор Америкийн Төрийн нарийн бичгийн дарга Энтони Блинкен Хятадад хийх айлчлалаа хойшлуулсан юм.
Нөгөө талаас Вашингтон Бээжинг тагнах явдалдаа Тайвань арлыг ашиглаж, Өмнөд Хятадын тэнгис дээгүүр тагнуулын онгоцоо тогтмол нисгэж Бээжингийн бухимдлыг төрүүлдэг билээ.
Эх сурвалж: Reuters
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
