Дэд Ерөнхийлөгч асан Майк Пэнс Ерөнхийлөгчийн сонгуульд нэр дэвших хүсэлтээ өгчээ 2023 / 06 / 06
АНУ-ын Дэд ерөнхийлөгч асан Майк Пэнс Бүгд Найрамдах намаас АНУ-ын Ерөнхийлөгчийн сонгуульд нэр дэвших хүсэлтээ албан ёсоор өгчээ. 63 настай Майк Пэнс сонгуулийн кампанит ажлаа энэ лхагва гарагт Айова мужид албан ёсоор эхлүүлэхээр төлөвлөжээ. Тэрээр Ерөнхийлөгчийн сонгуульд нэр дэвших эрхийн төлөө Ерөнхийлөгч асан Доналд Трампын эсрэг өрсөлдөх юм.
Майк Пэнсийн хувьд 2017-2021 онд Ерөнхийлөгч Доналд Трампын дор Дэд ерөнхийлөгчөөр ажиллаж байсан билээ. Д. Трампын хувьд Бүгд Найрамдах намаас нэр дэвших хүсэлт гаргасан улстөрчид дундаас одоогийн байдлаар хамгийн өндөр рейтингтэй яваа юм.
Консерватив үзэлтэйгээрээ алдартай Майк Пэнс Доналд Трампыг ерөнхийлөгчийн бүрэн эрхийнх нь хугацааны турш дэмжиж ирсэн ч Д. Трамп 2020 оны сонгуульд ялагдал хүлээснийхээ дараа дэмжигчдээ Конгрессийн ордон луу дайрахыг нь хөхиүлэн дэмжсэн нь Майк Пэнсийг өөрийг нь болон түүний гэр бүлийг аюулд оруулсан хэмээн мэдэгдэж, Д. Трампаас зайгаа барьсан юм.
Одоогийн байдлаар Бүгд Найрамдах намаас Флоридагийн амбан захирагч Рон ДеСантис, НҮБ-д АНУ-ыг төлөөлж байсан Никки Хэйли, Өмнөд Каролинагийн сенатор Тим Скотт, бизнес эрхлэгч Вивек Рамасвеми, Арканзасйн амбан захирагч асан Аса Хатчинсон, радио хөтлөгч Лерри Элдер нар Ерөнхийлөгчийн сонгуульд нэр дэвших хүсэлтээ албан ёсоор гаргаад байгаа юм.
Эдгээр нэр дэвшигчдээс рейтингээрээ Д. Трампын дараагаар бичигдэж байгаа нь Рон ДеСантис юм. Тэрээр Д. Трампын гол өрсөлдөгч гэгдэж байгаа аж.
Ирэх саруудад Бүгд Найрамдах намаас нэр дэвшигчид телевизийн хэд хэдэн мэтгэлцээнд оролцох юм.
Ирэх 2-р сард АНУ-ын муж тус бүрт сонгуулийн эхний шат эхлэх бөгөөд хамгийн олон санал авсан нэр дэвшигч Бүгд Найрамдах намаас 2024 оны АНУ-ын Ерөнхийлөгчийн сонгуульд нэр дэвшиж, Ардчилсан намаас нэр дэвшигч Жо Байдентай өрсөлдөх юм.
Эх сурвалж: CNN
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
