АНУ Альцгеймерын эмчилгээнд хэрэглэх шинэ эм бүртгэж авчээ 2021 / 06 / 08
АНУ-ын Хүнс ба Эмийн хяналтын алба Альцгеймерын эмчилгээнд хэрэглэх адуканумаб нэртэй эмэнд зөвшөөрөл олгож, бүртгэн авчээ.
Адуканумаб нь өнгөрсөн 20 жилд АНУ-д Альцгеймерын эмчилгээнд хэрэглэгдэхээр бүртгэгдсэн анхны шинэ эм юм. Америкийн Biogen компанийн бүтээсэн тус эмийг Адухелм нэрээр борлуулах гэнэ.
Адухелм эм нь ахмад настнуудын дунд хамгийн элбэг тохиолддог зөнөглөх өвчний нэг хэлбэр болох Альцгеймерын эмгэгийн шинж тэмдгийн эсрэг үйлчлэхгүй харин уг эмгэгийг үүсгэж буй шалтгаанд үйлчлэх аж.
Тус эм нь хүний тархинд үүсдэг амилоид хэмээх уургийг устгах үйлчилгээтэй ба амилоид уураг нь ой санамж, харилцаа, эргэцүүлэн бодох чадварыг бууруулдаг нь тогтоогджээ.
Дэлхий дээр Альцгеймерын эмгэгтэй нийт 30 сая гаруй хүн байгаагийн дийлэнх нь 65-аас дээш насныхан аж. Адухелм нь 80-аас доош настай, Альцгеймерын эмгэгийн эхний шатанд яваа өвчтнүүдэд тохиромжтой гэдгийг онцолж байна.
Өнгөрсөн 10 жилийн хугацаанд Альцгеймерын эмчилгээнд хэрэглэх 100 гаруй эм бэлдмэл туршигдсаны нэг нь ч үр дүнгээ үзүүлж чадаагүй аж. Адухелм эм нь 100 хувийн үр дүн үзүүлэх бэлдмэл биш ч уг эмийг бүртгэн авсанаар зөнөх өвчинтэй тэмцэх явдалд томоохон түлхэц болж өглөө хэмээн мэргэжилтнүүд үзэж байна.
2019 оны 3-р сард эцсийн шатандаа явж байсан Адухелм эмийн туршилтыг зогсоож байсан ба 3000 хүн оролцсон уг эмийн туршилтын явцад Адухелм бэлдмэл нь үр дүнгээ өгөхгүй байна гэж үзжээ.
Гэсэн хэдий ч 2019 оны сүүлээр Америкийн Biogen компани судалгаа шинжилгээнийхээ олон тооны материалыг судалж үзсэний эцэст адухелмийг өндөр тунгаар хэрэглэснээр оюун санааны чадвар буурах явдал мэдэгдэхүйц удааширч байсныг тогтоожээ.
Эх сурвалж: https://www.bbc.com/news/health
Содномцэрэнгийн Энхзаяа
ikhmongol.mn
холбоотой мэдээ
Сэтгэгдэл
