Кипрей буюу иван цайны ургамал

Нийтлэгдсэн огноо: 2021-01-27 16:45:00

Кипрей буюу иван цай гэх энэ ургамал сүүлийн үед Шаргаморьт зүгийн зуслантай айлуудын хавиар энд тэндгүй их ургах болжээ.

Шарталтыг сайн тайлахаас өгсүүлээд тайвшруулах, нойрсуулах үйлчилгээтэй. Гоёмсог өнгөтэй ягаан цэцгээрээ орчноо чимдэг энэ ургамлыг таслахаас харамсмаар байдаг ч үрээ өөрөө агаарт хөөрөн цацаж мундаг хурдан үржин тархдаг учраас жилээс жилд тархдагийг нь дэмжиж өгөөд хэрэглэхэд харамсмааргүй эд юм. Шээс сайн гаргадаг.

Орос ардын уламжлалт эмнэлэгт хэрэглэдэг иван цайны хатаасан навч цэцгийн ханд өдөр тутмын ханиад хамууг эмчлэхээс авахуулаад элдэв төрлийн арьсны идээт өвчнийг эмчлэх талаараа эдүгээ ОХУ-д ургадаг эмийн ургамлыг тэргүүлдэг талаар https://www.rusteaco.ru/…/ivan-chay-lechebnye-svoystva-i-p…/ сайтад бичсэн байна.

Оросууд эртнээс иван цайны хандыг идээт үрэвсэл, ханиад томуу, тархи толгойгоор таллаж хатгах, чих өвдөх, булагтах, ангина болоод ходоодны өвчин шархыг эмчлэхээс өгсүүлээд цус багадалт, стресст орсон үед тайвшруулах /валеринаас илүү үйлчилгээтэй/, тайвшруулах нойрсуулах, унаж татах зэрэг төв мэдрэлийн системийн өвчнийг анагаах, төрөл бүрийн хорт хавдрыг анагаахад ч хэрэглэдэг байж. Иван цайнд агуулагдах витамин С бусад төрлийн амин дэмүүд ямар ч ургамлаас хэд дахин илүү мөн цусан дахь холестринийг багасгахаас гадна хоол идэх дуршлыг дардаг учраас турахыг эрмэлздэг бүдүүн хүүхнүүд уухад гэмгүй юм билээ. Хатаасан иш үндсээр нь олс хийхээс гадна тариа шиг шиг тээрэмдэж гурил гаргаж авч болдог гэнэ.

Иван цай төмсний минь жоохон талбайд үржээд байхаар нь энэ зураган дээр харагдаж буй 30см зузаан элсээр хучаад хаячихсан чинь нэвт ургаад гараад ирсэн гээд бод доо. Жилдээ надтай бараг чацуу шахам /1.75см/ ургах энэ ургамал улиас аятай хөвөн шиг хөнгөхөн үрээ маш хол цацдаг юм билээ. Манай зуслангийн хөрш хөдөлмөрийн баатар Сэдбазар гуай, Гарьд манлай эмнэлгийн захирал Цэгмид хоёр үүнийг батална. Тэдний хашаанд манайхаас хийсч ороод энд тэндгүй цэцэглэчихсэн байгаа. Иван цай бол үнэхээр бурханы хишиг шүү. Тарихад ургаж өгдөггүй мөртлөө өөрөө дуртай газраа хаана ч хамаагүй ургачихна. Нэрт найруулагч Жигжидсүрэн гуайнд нэг боодол иван цайны үртэй иш өгөөд явуулсан, ургасан эсэхийг нь ирэх жил танилууд нь асуугаарай.

Танай хашаанд хаанаас ч юм үр нь нисэж ирээд ургачихсан байвал хайрлаж хамгаалж үржүүлж ууж хэрэглэж байгаарай. Тун гэмгүй эд шүү. Гүүгэлдээд Оросын сайт руу ороод үзээрэй. Заг хүйтэн, тэмбүү зэрэг бэлгийн замын үрэвсэлт өвчнүүдийг эмчлэхээс өгсүүлээд хий юм харах, дэмийрэх зэрэг архины солиорлыг эмчлэхэд орос эмээ нар хэрэглэдэг байсан талаар дэлгэрэнгүй бичсэн байгаа.

Шаравын Пүрэвсүрэн