Серена Уильямс эхний өрсөлдөгчөө яллаа

Нийтлэгдсэн огноо: 2016-05-25 16:15:03

АНУ-ын тэргүүн теннисчин Серена Уильямс Словакын 27 настай теннисчин Магдалена Рыбариковатай учраа тааран тоглолоо. Словак бүсгүйн хувьд Францын их дуулгад хоёрдугаар шатнаас цааш тоглож үзээгүй юм. Харин С.Уильямсын хувьд Францын тэмцээнд хэдий нь гурван удаа түрүүлсэн амжилттай яваа тамирчин. Тэрбээр энэ тоглолтонд тийм ч их хүч гаргасангүй 6:2, 6:0-н харьцаатай хоёр сет төвөггүйхэн хожсоноор аваргаа хамгаалахад нэг шат ойртсон байна.

С.Уильямс дараагийн шатанд Бразилын Тельяна Перейратай өрсөлдөх юм. Харин Францын их дуулгад амжилттай оролцож буй Голландын 24 настай залуу теннисчин Кики Бертенс энэ шатанд Германы шилдэг бүсгүйчүүдийн нэг дэлхийн чансааны гуравт эрэмбэтэй Анжелика Кербертэй оноолт тааран өрсөлдлөө. Герман бүсгүйн хувьд 2012 онд Францын тэмцээнд шөвгийн наймд шалгарч оргил амжилтаа үзүүлж байсан юм.

Харин өчигдрийн тоглолтонд Кики Бертенс эхлэлийг сайн тавьж 6:2-оор хожсон. Дараагийн сетэд Анжелика Кербер хариуг нь 6:3 болгосон ч сэтгэл санааны давуу байдлыг аваад байсан К.Бертенс шийдвэрлэх үед 6:3-аар хожин Герман бүсгүйг эхний шатнаас гэр лүү нь буцаалаа. К.Бертенс дараагийн шатанд Италийн 24 настай залаа теннисчин Гиорги Камилатай учраа таарна.

www.ikhmongol.mn