Дональд Трампыг “Оны хүн”-ээр тодруулав

Нийтлэгдсэн огноо: 2016-12-08 11:51:00

Америкийн Time сэтгүүл уламжлал ёсоороо дэлхий хамгийн нөлөө бүхий хүмүүсийн чансааг эрэмблэж үзэв. Энэ удаа харин тус сэтгүүлийн “Оны хүн”-ээр АНУ-ын ерөнхийлөгчөөр сонгогдоод буй тэрбумтан бизнесмэн Доналд Трамп тодорч магадгүй байгаа аж.

Тус сэтгүүл ээлжит дугаарынхаа хавтсан дээр арьсан буйданд хагас эргэн харж суугаа тэрбумтаны зургийг тавихаар төлөвлөөд байгаа бөгөөд харин дээр нь "Америкийн нэгдсэн улсын ерөнхийлөгч" гэсэн гарчиг тавих гэнэ. Харин түүний үйл хэргийг эерэг болон сөрөг аль нэг талаас нь тодруулах редакцийн нийтлэлийн чиг шугам хараахан тодорхойгүй байгаа аж.

Трампаас гадна сэтгүүлийн "Оны хүн"-д тодрох өөр нэр дэвшигчдийн дотор Владимир Путин, Хиллари Клинтон, Facebook-ийг үндэслэгч Марк Цукерберг, дуучин Бейонсе Ноулс, Энэтхэгийнг ерөнхий сайд Нарендра Моди, Британийн улс төрч Найжел Фараж, Туркийн ерөнхийлөгч Режеп Тайип Эрдоган, гимнастикч Симона Байлз, Хүний ДНХ-ийг зохицуулах технологи болох CRISPR-г зохион бүтээсэн эрдэмтэд, ус хангамжийн сан хордсон болохыг даруй олж мэдсэн Америкийн Флинт иргэд багтсан байна.

Тус сэтгүүлийн уншигчдын дунд явуулсан санал асуулгаар өмнө нь Энэтхэгийн ерөнхий сайд Нарендра Модиг оны хүнээр сонгоод байсан бөгөөд түүний араас АНУ-ын еөрнхийлөгч Барак Обама болон дараагийн ерөнхийлөгч Доналд Трамп, WikiLeaks цахим хуудсыг үндэслэгч Жулиан Ассанж нар тус бүр 7% санал авч удаалсан байна.

Сэтгүүлийн уншигчдын саналаар тэрчлэн Барак Обамагийн эхнэр Мишел (5%), тэргүүн хатагтай асан Хиллари Клинтон (4%), Владимир Путин (6%), Facebook-ийг үндэслэгч Марк Цукерберг (2%) оноо авчээ.

Энэтхэгийн ерөнхий сайд Нарендра Моди өмнө нь 2014 онд мөн Time сэтгүүлийн оны хүнээр шалгарч байсан бол 2015 онд тус сэтгүүлийн редакци ХБНГУ-ын канцлер Ангела Меркелийг оны хүнээр сонгож байсан билээ.