Азийн спортын од: Р.Тани

Нийтлэгдсэн огноо: 2016-01-29 16:51:53

2011 оны наймдугаар сард хуралдсан Олон улсын жүдо бөхийн холбооны шийдвэрээр Японы Р.Таниг бүх цаг үеийн шилдэг эмэгтэй тамирчнаар өргөмжилсөн. Үнэхээр ч түүний зуун дамнасан амжилтыг нь хэн ч эвдэж чадаагүй юм. Олимпийн хошой, дэлхийн долоон удаагийн аварга Р.Тани 1975 оны есдүгээр сарын 6-нд Фүкүока хотод төржээ. 16 настайдаа тив, дэлхийн аваргаас хүрэл медаль авч байсан Р.Тани “Барселона 92”-оос мөнгөн медаль хүртсэн. Тухайн үед Олимпийн аваргын төлөө Францын Ч.Новакт хожигдсон юм.

Үүнээс хойш “Сидней 2000”, “Афин 2004” зуны олимпийн аварга, “Атланта 1996”-гаас мөнгө, “Бээжин 2008”-аас хүрэл, 1993, 1995, 1997, 1999, 2001, 2003, 2007 онд дэлхийн аваргаас алт, 1994 онд Хирошимад болсон Азийн наадмаас алт, 1995 онд Фүкүокад болсон оюутны “Универсиад” наадмаас алтан медаль хүртсэн.

1996 оны Атлантын Олимпоос хойш ялагдал гэдгийг мартаад байсан тэрээр 2008 онд БНХАУ-ын Бээжин хотод болсон зуны Олимпийн хагас шигшээд Румын улсын А.Думитруд ялагджээ. Хоёр тамирчин хэн хэн нь үнэлгээ авч чадаагүй бөгөөд цаг дуусахаас өмнөхөн Р.Тани торгуулж, харамсалтайгаар хожигдсон. Гэхдээ хүрэл медалийн төлөө ОХУ-ын Л.Богдановаг цэвэр савсан юм. Алдарт Р.Таниг хожсон А.Думитру Олимпийн аварга болж байсан түүхтэй.

Японы хамгийн шилдэг эмэгтэй жүдоч Р.Тани 84 барилдаан дараалан ялсан бөгөөд энэхүү гайхамшигтай цувралыг нь БНАСАУ-ын Ке Сунь-Хи зогсоосон. Орчин үеийн Олимпийн хөдөлгөөн үүсч хөгжсний зуун жилийн ойд зориулан АНУ-ын Атланта хотод 1996 онд XXVI наадам болсон. Атлантагийн дэвжээнд Р.Тани шигшээд үлдсэн ч ийнхүү ялагдаж мөнгөн медаль авсан. Мөн ялалтын цувралдаа цэг тавьж байлаа.

Таван зуны Олимпийн их наадмаас медаль авсан Японы Р.Танигийн амжилтыг хэзээ, хэн эвдэхийг нь таашгүй юм. Хүн төрөлхтний цэнгэлийн манлай болсон Олимпийн наадамд Р.Танигийн амжилт мөнхөрсөн товчхон түүхийг өгүүллээ.

Р.Танигийн үзүүлсэн амжилт